Чалец Савета Рэспублікі Нацыянальнага сходу, старшыня Наваполацкага гарвыканкама Дзмітрый Дзямідаў правёў прамую тэлефонную лінію і асабісты прыём у Расонах. Наваполацкая «Новая газета» пафасна зазначыла, што «сенатор неравнодушен к чаяниям и обращениям избирателей, а те, в свою очередь, ему доверяют и убеждены в поддержке со стороны власти».

У мясцовай «Аршанскай газеце» з’явілася абвестка пра тое, што мясцовыя ўлады праводзяць інтэрнэт-апытанне, дзе ў горадзе найлепей было б збудаваць Палац шлюбаў. Сваімі меркаваннямі аршанцаў прасілі падзяліцца на афіцыйным сайце райвыканкама ў раздзеле «Апытанні». Аднак такой старонкі на сайце проста не існуе: на яе нельга ні перайсці па спасылцы з абвесткі ў газеце, ні адчыніць непасрэдна з сайта. Дык ці насамрэч улады цікавяцца меркаваннямі гараджан?

Асноўнай тэмай так званага Дня інфармавання, які ладзілі ўлады Мёршчыны ў Язненскім сельсавеце, стала дэмаграфічная бяспека. Падчас сустрэчы з жыхарамі аграгарадка Язна кіраўнік Мёрскага раёна Ігар Кузняцоў агучыў лічбы: на Міёршчыне пражывае каля 18 тысяч чалавек, з іх трэцюю частку складаюць людзі пенсійнага ўзросту. За мінулы год нарадзілася толькі 112 дзяцей, а памерлі ў тры разы больш - 338 чалавек. Насельніцтва старэе, яго колькасць памяншаецца.

Вядзецца пра так званых «тэлефонных тэрарыстаў з Украіны», якія раней нібыта «змушалі беларусаў браць крэдыты ў банках і пералічваць ім грошы», а цяпер яшчэ і «схіляюць да дыверсій у Беларусі». Яшчэ месяц таму, распавядаючы пра занадта даверлівых мясцовых жыхароў, якія пасля званкоў на «Вайбер» пералічвалі грошы тэлефонным махлярам, дзяржСМІ пісалі хіба пра тое, што пацярпелыя нібыта заўважалі ўкраінскі акцэнт падчас гаворкі. Цяпер газеты, цытуючы матэрыялы СК, адназначна заяўляюць, што махляры – грамадзяне Украіны, і гэтых людзей цікавіць ужо не толькі незаконнае адыманне грошай, але і здзяйсненне тэрарыстычных актаў па загадзе нейкіх таямнічых міжнародных структур.