Нагадаем, 9 красавіка судзьдзя суду Гарадоцкага раёну Аляксандра Носава прызнала Леаніда Аўтухова вінаватым у парушэньні артыкулу 23.5 Кодэксу аб адміністрацыйных правапарушэньнях. Актывіст БНФ, згодна з рашэньнем судзьдзі, нанёс абразу службовай асобе - начальніку раённага ўпраўленьня па працы, занятасьці і сацыяльным забесьпячэньні Пятру Прасолаву, параўнаўшы яго з тэрарыстамі з Луганску і Данецку ў сваім запісе ў кнізе заўваг і прапаноў райвыканкаму. Гэты запіс Аўтухоў зрабіў пасьля таго, як яго зьнялі з уліку па беспрацоўі. Апазіцыянер упэўнены, што быў пазбаўлены статусу беспрацоўнага незаконна, і гэта адбылося па ўказаньні Прасолава.
Падаць касацыйную скаргу Леаніда падштурхнула тое, што ён не пагадзіўся з пастановай, вынесеным яму судом правінцыйнага Гарадка. На думку «правапарушальніка», суд над ім быў прадузятым, а судзьдзя ня выбрала часу разабрацца ва ўсіх абставінах яго справы, каб вынесьці справядлівае і кампэтэнтнае рашэньне.
У сваёй пазоўнай заяве спадар Аўтухоў згадаў адзінаццаць акалічнасьцяў, на якія мусіла зьвярнуць увагу касацыйная інстанцыя. Апазыцыйны палітык хацеў дамагчыся таго, каб яго справа была разгледжаная паўторна з удзелам іншага судзьдзі суду Гарадоцкага раёну.
Да найбольш значных акалічнасьцяў можна аднесьці сур’ёзныя працэсуальныя парушэньні, якія дапусьціла судзьдзя Гарадоцкага суду. Так, яна не пагадзілася адкласьці судовае паседжаньне для арганізацыі абароны і ўступленьня ў справу адваката. Не была таксама задаволеная просьба «правапарушальніка» аб выкліку важных сьведак па справе. Апроч таго, на думку Аўтухова, судзьдзя ўзяла на сябе адказнасьць ацэньваць словы, запісаныя ў кнізе заўваг і прапаноў гарадокскага выканаўчага камітэту, з пункту гледжаньня іх абразьлівасьці, хаця такое права ёй ня дадзенае працэсуальным законам.
Судзьдзя Іванова не прыняла ніводнага доваду апазыцыянэра. Яе выснова: пакараньне, вынесенае судзьдзёй суду Гарадоцкага раёну А. Носавай, заснаванае на законе і не супярэчыць яму. Яна таксама зрабіла рэмарку, што штраф накладзены не па максімуме па прымененым артыкуле (50 базавых велічынь). А тыя 30 базавых, які атрымаў у выглядзе штрафу Аўтухоў, трэба расцэньваць як гуманнасьць ў дачыненьні да яго з боку яе гарадоцкай калегі.
Просьба апазыцыйнага палітыка замяніць яму штраф на адміністрацыйны арышт была таксама адхіленая, паколькі ў касацыйнай інстанцыі ня можа быць ужытае пакараньне больш суворае, чымся прызначанае судом першай інстанцыі.
Цяпер палітык зьбіраецца зьвярнуцца ў наглядныя судовыя інстанцыі для таго, каб дамагчыся праўды і справядлівасьці, якіх ён не знайшоў у інстанцыі касацыйнай.