Віцябляніна Алега Баразну затрымалі 7 траўня. Пасьля складаньня адміністрацыйнага пратаколу яго адвезьлі ў ізалятар часовага ўтрыманьня (ІЧУ), дзе ён правёў усю ноч. Ягоную справу 8 траўня разглядала судзьдзя Алена Цыганкова. Суд прайшоў у анлайн-рэжыме (абвінавачаны знаходзіўся ў ІЧУ, судзьдзя – у залі паседжаньня).
Паводле міліцэйскага пратаколу, Алег Баразна 3 траўня ўзяў удзел у пікетаваньні, якое не было санкцыянаванае гарадзкімі ўладамі, пры гэтым інфармацыя аб мерапрыемстве была загадзя разьмешчаная ў інтэрнэце.
У якасьці сьведкі выступіў начальнік аддзелу аховы грамадзкага правапарадку Чыгуначнага РАУС Дзьмітрый Яўменаў. На судзе ён патлумачыў, што «грамадзяне падчас сустрэчы абмяркоўвалі грамадзка-палітычную і эканамічную сытуацыю ў краіне, кармілі галубоў, а нехта пры гэтым пракрычаў «Стоп, таракан!»
Алег Баразна з пратаколам згадзіўся, але патлумачыў што гэта не было масавым мерапрыемствам, а была звычайная сустрэча сяброў, і «Стоп, таракан!» ён дакладна не крычаў.
«Не было ані сьцягаў, ані транспарантаў...»
«Не было ані сьцягаў, ані транспарантаў. Я ў страшным сьне ня мог сабе ўявіць, што за тое, што мы зрабілі, могуць на цэлыя суткі кінуць у ІЧУ, а потым яшчэ пакараць у судзе. У галаве гэта ня ўкладваецца!..» – заявіў на судзе Алег Баразна.
Паведаміў таксама, што яго затрымлівалі аж 8 супрацоўнікаў МУС.
«Хіба пасьля гэтага ня будзеш абмяркоўваць палітычную і эканамічную сытуацыю ў краіне, калі бачыш, як і на што марнуюцца нашыя грошы?» – сказаў Баразна.
Сваю віну на судзе Алег Баразна не прызнаў.
Тым ня менш, судзьдзя Цыганкова прызнала віцябляніна вінаватым ва ўдзеле ў несанкцыянаваным пікетаваньні і пакарала яго штрафам у памеры 20 базавых велічынь (540 рублёў).
Ужо пасьля вынесенага рашэньня Алега Баразну адвезьлі зь віцебскага ІЧУ ў аддзяленьне аховы правапарадку на вуліцы Кірава, дзе на яго склалі яшчэ адзін пратакол за правапарушэньне, прадугледжанае артыкулам 23.34 КаАП. Мужчына расказаў, што чарговы пратакол быў складзены за ягоны ўдзел у сустрэчы з блогерам Сяргеем Ціханоўскім 30 красавіка каля піраміды «Марка-сіці» ў Віцебску.
Разгляд справы адбудзецца ў судзе Чыгуначнага раёну Віцебску 19 траўня (пачатак – 11.00).
Зьміцер Міраш
Камэнтуйце гэтую навіну на нашай старонцы ў facebook!