У звароце, які распаўсюдзілі ў сацыяльных сетках сябры ініцыятыўнай суполкі «Хайсы», адзначаецца, што некалькі гадоў таму ў гэтым лесе знайшлі чалавечыя парэшткі, якія праляжалі ў зямлі шмат гадоў. Частку іх вывезьлі для вывучэньня і перапахаваньня, але шматлікія парэшткі засталіся ляжаць у зямлі.
На думку месьцічаў, усталяваньне крыжа на гэтым месцы дасьць магчымасьць усім ахвотным рабіць тут памінальныя малітвы: «Незалежна ад таго, якімі будуць далейшыя захады ўпаўнаважаных органаў у дачыненьні да парэшткаў (эксгумацыя з наступным перапахаваньнем альбо кансэрвацыя і арганізацыя ўрочышча), гэтае месца заслугоўвае адпаведнага стаўленьня з боку нашчадкаў, суайчыньнікаў і дзяржавы, каб кожны, хто наведвае гэтае месца, мог, схіліўшы галаву, ушанаваць памяць сваіх продкаў, сваю гісторыю. Малітва за душы людзей, якія знайшлі свой прыстанак у лясной глушы ўдалечыні ад цьвінтароў, - тое нямногае, што мы, як нашчадкі, можам і павінны зрабіць проста зараз дзеля захаваньня памяці».
Акрамя таго, у звароце адзначаецца, што ўсталяваньне крыжа дапаможа ахаваць гэтае месца ад актаў вандалізму і замахаў «чорных капальнікаў».