16 сакавіка 2023 году  пракуратура Рэспублікі Беларусь зацвердзіла абвінавачанне ў дачыненні да палітзняволенай Яны Пінчук у канчатковай рэдакцыі і накіравала крымінальную справу на разгляд у Мінскі гарадскі суд. Разгляд прызначаны на 10 красавіка 2023 года.

Палітзняволеную ураджэнку Віцебска Яну Пінчук абвінавачваюць у «стварэнні або кіраўніцтве тэрарыстычнай арганізацыяй». Следства скончылась месяц таму, а суд над Янай прызначаны на 10 красавіка ў Мінгарсудзе. Судовы працэс будзе праходзіць пад старшынствам суддзі Таццяны Фалькоўскай. У выпадку, калі суд прызнае даказаным ўсе прад'яўленыя абвінавачванні, дзяўчыне пагражае пакаранне ў выглядзе пазбаўленнем волі на тэрмін да дванаццаці гадоў.

У межах кампаніі салідарнасці #WeStandBYyou, арганізаванай нямецка-швейцарскай праваабарончай арганізацыяй «Libereco – Партнёрства за правы чалавека», сімвалічныя «хросныя» з’явіліся ў палітзняволенай ураджэнкі Віцебску Яны Пінчук і ў палітвязня з Воршы, прафсаюзнага актывіста Васіля Бераснева. Падтрымаць зняволеных вырашылі прадстаўнікі Вялікабрытаніі і Нямеччыны.

Праваабарончая супольнасць Беларусі ўключыла ў пералік палітычных зняволеных ураджэнку Віцебску Яну Пінчук, якую вінавацяць у паклёпе, незаконных дзеяннях з персанальнымі дадзенымі, распальванні сацыяльнай варожасці і варажнечы, стварэнні і кіраўніцтве экстрэмісцкім фармаваннем, заклікам да абмежавальных мер (санкцый). Зараз дзяўчыну ўтрымліваюць у віцебскім СІЗА-2, у верасні Яну Пінчук дэпартавалі з Расеі насуперак закліку Камітэту па правах чалавека ААН абараніць дзяўчыну ад пераследу ў Беларусі.

Ініцыятыва «Вольныя паштоўкі» распавядае пра палітвязняў праз іхныя малюнкі, дасланыя з-за кратаў. Нярэдка палітзняволеныя бавяць час за маляваннем, а малюнкі дасылаюць у лістах да родных і сяброў. Удзельнікі ініцыятывы вырашылі выпусціць паштоўкі з турэмнымі малюнкамі, дзейнасць праекту працягваецца ўжо некалькі месяцаў. І сярод апошніх паштовак – творчасць віцяблянкі Яны Пінчук, якой пагражае вялікі тэрмін зняволення за грамадзянскую актыўнасць.

Прайшло 10 дзён, як ураджэнку Віцебшчыны Яну Пінчук расейскія ўлады экстрадавалі ў Беларусь. Цяпер маладая жанчына знаходзіцца ў Віцебскім абласным следчым ізалятары №2. Да яе прыменена мера стрымання ў выглядзе ўзяцця пад варту на 2 месяцы. Па неправераных дадзеных, Яна ўдзельнічае ва ўсіх у следчых дзеяннях, прызначаны некалькі экспертыз. Расейскія праваабарончыя арганізацыі прызналі Пінчук палітвязнем, а беларускія пакуль яе такой не лічаць.

Расейскія ўлады задаволілі запыт Генеральнай пракуратуры Беларусі аб выдачы 25 гадовай Яны Пінчук для прыцягнення да крымінальнай адказнасці. 1 верасня 2022 года маладая жанчына перададзена на тэрыторыю Беларусі і ўжо змешчаная ў Віцебскі абласны ізалятар №2. Крымінальная справа ў дачыненні да Яны Пінчук знаходзіцца ў вытворчасці Віцебскага гарадскога аддзела Следчага камітэта. 

Палітзняволеная беларуска Яна Пінчук знаходзіцца ў СІЗА ў Смаленску. У аўторак яе наведаў адвакат. Раней Пінчук з Пецярбурга перавялі ў Маскву, далей — у Яраслаўль, Бранск. Расійскія ўлады збіраюцца выдаць дзяўчыну Беларусі. Канчатковым пунктам гэтага доўгага драматычнага "падарожжа" стане Віцебскі абласны следчы ізалятар №2.

Праект «Палітвязынкі» (@politvyazanka), з якім можна пазнаёміцца праз Інстаграм, распавядае пра жанчын-палітзняволеных. Яго аўтаркі – журналістка Яўгенія Доўгая і мастачка Ганна Татур. Кожны пост складаецца з партрэта і кароткай гісторыі пра жанчыну, якая цяпер за кратамі. Сярод гераіняў праекту – Ірына Пярцова, Эма Сцепулёнак і Яна Пінчук, ураджэнкі Віцебшчыны.

Інфармацыю пра тое, што яе падабаронная пакінула Расею пацвердзіла адвакат дзяўчыны Марыя Бяляева. Але канкрэтнае месца знаходжання Яны Пінчук пакуль не вядомае. У Беларусі віцяблянку абвінавачваюць па пяці крыминальных артыкулах: паклёп (артыкул 188 КК), незаконныя дзеянні з персанальнымі данымі іншай асобы (частка 3 часткі 203-1 КК), распальванне сацыяльнай варожасці (частка 3 артыкула 130 КК), стварэнне і кіраўніцтва экстрэмісцкім фармаваннем (частка 1 і 2 артыкула 361-1 КК), заклікі да дзеянняў супраць нацыянальнай бяспекі (частка 3 артыкула 361 КК).