Праваабарончы цэнтр "Вясна" працягвае збіраць факты палітычнага пераследу па ўсёй краіне за 22 і 23 верасня. Грамадзян, па-ранейшаму, затрымліваюць, праводзяць ператрусы, ціснуць на палітвязняў і ўжываюць іншыя формы ціску за іх актыўную пазіцыю і незадаволенасць дзеяннямі ўлады. Калі вас ці вашых блізкіх затрымалі, паведамляйце нам:
|
Суд над палітзняволеным Ігарам Банцарам, на якім яму мусілі змяніць меру пакарання, перанеслі
Працэс распачаўся (прычым праходзіў проста ў будынку папраўчай установы ў Віцебску, так званай «хіміі»), але Банцар запатрабаваў адваката. Новае паседжанне адбудзецца 29 верасня.
Нагадаем, палітзняволенаму Ігару Банцару хочуць змяніць рэжым з «хіміі» на папраўчую калонію. Такога рашэння дамагаецца адміністрацыя папраўчай установы адкрытага тыпу №9 Віцебска, дзе мужчына адбывае зняволенне. Яго абвінавачваюць у парушэнні правілаў адбывання пакарання на «хіміі». Суд мае прыняць рашэнне 23 верасня.
Адміністрацыя выстаўляе прэтэнзіі Банцару за 6 эпізодаў. Сярод іх: заснуў на стуле, не пагаліўся, не выканаў каманду «адбой». Адміністрацыя лічыць, што гэтага дастаткова, каб замяніць Банцару абмежаванне волі на пазбаўленне волі. Ігар лічыць прэтэнзіі адміністрацыі палітычным ціскам.
«Я адмовіўся падпісаць прашэнне аб памілаванні», – зазначыў ён.
«Трэцюю галадоўку я ўжо не вытрымаю, але я не магу гарантаваць, што яе не будзе», – дадаў Банцэр.
У Беларусі працягваюцца затрыманні рабочых, якія заяўлялі пра страйк
- Адзін з затрыманых — Валянцін Цераневіч. Фота: "Радыё Свабода"
На дадзены момант «Вясне» вядомыя наступныя прозвішчы затрыманых:
- Сяргей Шэлест, «Гродна Азот», змешчаны ў СІЗА КДБ
- Андрэй Пагерыла, «Гродна Азот», змешчаны ў СІЗА КДБ
- Уладзімір Жураўка, «Гродна Азот»
- Ірына Мацкевіч, дзяўчына Уладзіміра Жураўкі
- Валянцін Цераневіч, «Гродна Азот»
- Рыгор Рубан, «Гродна Азот»
- Вадзім Яфіменка, «Гродна Азот»
- Дзмітрый Ільюшчанка, «Гродна Азот»
- Аляксандр Гашнікаў, БМЗ, змешчаны ў СІЗА КДБ
- Ганна Аблаб, Беларуская Чыгунка, змешчаная ў СІЗА КДБ
- Сяргей Дзюба, Беларуская Чыгунка, змешчаны ў СІЗА КДБ
- Арцём Рубан, «Гродна Азот»
- Аляксей Сідар, «Гродна Азот»
Спіс дапаўняецца.
Праваабаронцам пакуль невядома, што ставяць у віну затрыманым.
«Палівалі шампанскім магілу рэжыму». ГУБАЗіК «раскрыў» у Віцебску «экстрэмісцкую ячэйку»
Пра затрыманне ўдзельнікаў «экстрэмісцкай ячэйкі» ў Віцебску паведаміў тэлеграм-канал МУС Беларусі. Па інфармацыі ведамства, затрыманыя сем жыхароў абласнога цэнтру ва ўзросце ад 26 да 39 гадоў, якія датычныя да групавога хуліганства і «стварэння экстрэмісцкага фармавання».
Віцебскім праваабаронцам сталі вядомыя прозвішчы віцяблян, якіх абвінавачваюць у арганізацыі «экстрэмісцкага фармавання». Гэта Марына Праслава, Павел Сокалаў, Кацярына Макарэвіч, Юлія Лабунова, Арцём Латышаў, Ірына Пярцова, Канстанцін Бодэ і Святлана Гуркоўская.
Як паведамляе тэлеграм-канал МУС, мінулым летам затрыманыя стварылі закрытую тэлеграм-групу, у якой абмяркоўвалі «акцыі прамога дзеяння». Планавалі «шкодзіць маёмасць, а таксама чыніць шкоду іміджу дзяржаўных органаў і праваахоўнай сістэмы». Удакладняе, што падазраваныя працавалі ва ўстановах адукацыі, гандлю, медыцыны, а таксама ў дзяржарганізацыях.
«Таксама ўстаноўленая датычнасць некаторых фігурантаў да бессаромнага перформансу на гарадскіх могілках. Затрыманыя цынічна дэмантавалі шыльдачку на месцы пахавання чалавека, пасля чаго ўначы распівалі там спіртовыя напоі, разліваючы алкаголь на магілу і дэманструючы там самым пахаванне рэжыму», – паведамляецца ў заяве.
У дачыненні затрыманых распачатыя крымінальныя справы за злоснае хуліганства (ч. 2 арт. 339 КК) і стварэнне экстрэмісцкага фармавання (арт. 361-1 КК).
Начальнік віцебскага абласнога ўпраўлення ГУБАЗіК Сяргей Калантаеў сцвярджае, што акцыі фінансаваліся з-за мяжы і што зараз «устанаўліваюцца іншыя ўдзельнікі забароненай суполкі, якія знаходзяцца за межамі Беларусі».
Салігорскае выданне “Лідар-Прэс” пасля 28 гадоў працы вымушана прыпыняе сваю дзейнасць
"Так складаецца, што любы матэрыял, які праўдзіва асвятляе падзеі ў рэгіёне ці краіне, можа быць абвешчаны экстрэмісцкім з усімі вынікаючымі наступствамі. У такой сітуацыі мы не можам рызыкаваць нашымі супрацоўнікамі і вымушаныя спыніць дзейнасць рэдакцыі", — гаворыцца ў рэдакцыйным звароце.
У сакавіку 2021 года выданне спыніла друк папяровай версіі газеты. А ў чэрвені ў галоўнага рэдактара прайшоў ператрус.
Улады вырашылі заблакаваць сайт Hrodna.Lіfe
Рэдакцыя Hrodna.lіfe 22 верасня атрымала пастанову ад Пракуратуры Гродзенскай вобласці. У ёй паведамляецца пра блакаванне сайта Hrodna.lіfe і «аб абмежаванні доступа да яго суполак, уключыўшы ідэнтыфікатар дадзенага інтэрнэт-рэсурса ў спіс абмежаванага доступа», піша "БАЖ".
Прычынамі блакіроўкі сайта ўлады называюць:
"Асобныя артыкулы, якія суправаждаюцца відэаматэрыяламі, што негатыўна характэрызуюць пасля сканчэння выбарчай кампаніі грамадска-палітычную сітуацыю Беларусі і дыскрэдытуюць дзейнасць дзяржаўных праваахоўных органаў.
Прыцягненне рэдактараў «Гродна Лайф Медыя» Аляксея Шоты і Ірыны Новік да адміністрацыйнай адказнасці за распаўсюд экстрэмісцкіх матэрыялаў".
Інфармацыя дапаўняецца і абнаўляецца.
Крыніца: Затрыманне стачкамаўцаў, віцяблян і іншыя факты палітычнага пераследу 22 і 23 верасня Дапоўнена