Праваабарончая арганізацыя "Фонд Клуні за справядлівасць" (Clooney Foundation for Justice) апублікавала справаздачу аб судовым працэсе па справе Віктара Бабарыкі, у якім прыйшла да высновы, што стандарты справядлівага судовага разгляду ў дачыненні да Бабарыкі парушаны.
"Фонд Клуні за справядлівасць" (Clooney Foundation for Justice) заснаваны галівудскім акцёрам Джорджам Клуні і ягонай жонкай — юрысткай Амаль Клуні. Адной з ініцыятываў фонду з'яўляецца TrialWatch — маніторынг крымінальных судовых працэсаў у розных краінах з мэтай выкрыцця несправядлівасці і прасоўвання вяршэнства права.
Маніторынг працэсу ў дачыненні да Віктара Бабарыкі ажыццяўляўся ў межах дадзенай ініцыятывы шляхам непасрэднага назірання з залы судовага пасяджэння з 17 лютага па 6 ліпеня 2021 года.
У апублікаванай маніторынгавай справаздачы дэталёва апісаныя палітычны і прававы кантэкст, уключаючы ацэнку ўплываў на судовую сістэму з боку прэзідэнта, а таксама працэсы ў дачыненні да іншых грамадскіх актывістаў, спадарожныя крымінальнаму пераследу Віктара Бабарыкі.
Аналіз фактаў дазволіў маніторынгавай місіі зрабіць высновы пра парушэнне такіх правоў Віктара Бабарыкі, як:
- права на доступ да абаронцы да суда;
- права быць інфармаваным пра сутнасць прад'яўленых абвінавачванняў;
- права быць асуджаным кампетэнтным, незалежным і бесстароннім судом;
- права на прэзумпцыю невінаватасці;
- права на дастатковы час і ўмовы для падрыхтоўкі да абароны;
- права выкліку і допыту сведак.
Зыходзячы з праведзеных назіранняў і інфармацыі, якія прагучала ў судовых пасяджэннях, у справаздачы канстатаваная перадвызначанасць выніку працэсу ў пакаранне за ўдзел Бабарыкі ў выбарчай кампаніі.
Адзначаецца, што розныя высокапастаўленыя ўрадавыя чыноўнікі і дзяржаўнае інфармацыйнае агенцтва выступілі з крытычнымі заявамі ў дачыненні да Віктара Бабарыкі, нягледзячы на іх юрыдычны абавязак звяртацца з ім як з невінаватым да таго часу, пакуль не будзе даказаная яго вінаватасць. Пры гэтым у дачыненні да Віктара Бабарыкі было дапушчана парушэнне права на абарону — як у выглядзе перашкодаў у атрыманні юрыдычнай дапамогі адвакатаў, гэтак і пасродкам таго, што ў абвінавачванні не выкладалася, у якіх ягоных канкрэтных дзеяннях выявіліся інкрымінаваныя яму злачынствы. Маніторынгавая місія робіць выснову пра тое, што сукупны шэраг парушэнняў аказаў негатыўны ўплыў на справядлівасць судовага разгляду па справе Бабарыкі, што ў рэшце рэшт магло стаць істотным фактарам яго асуджэння.
На аснове праведзенага назірання і выяўленых парушэнняў аўтары справаздачы адзначаюць: "Палітычны кантэкст у спалучэнні з апісанымі парушэннямі прыводзіць нас да вельмі сур'ёзных асцярогаў, што абвінавачванне і суд над спадаром Бабарыкам былі выкліканыя неналежнымі матывамі, што ўяўляе сабою злоўжыванне працэсам".
Азнаёміцца з маніторынгавай справаздачай можна па спасылцы:
"Фонд Клуні за справядлівасць": справаздача аб судовым працэсе па справе Віктара Бабарыкі
Крыніца: "Фонд Клуні за справядлівасць" апублікаваў справаздачу аб судовым працэсе па справе Віктара Бабарыкі