Па словах жонкі Андрэя Новікава Вольгі, да іх дадому прыехала група міліцыянтаў на чале з начальнікам Пастаўскага РАУС, забралі яе мужа і павезьлі ў райцэнтар. Да панядзелка, да суду, ён будзе знаходзіцца ў мясцовым ізалятары.
Пратакол аб адміністрацыйным правапарушэньні быў складзены паводле артыкулу 23.34 КаАП. Андрэя Новікава абвінавачваюць ва ўдзеле ў несанкцыянаваным масавым мерапрыемстве.
Легальныя пікеты, за ўдзел у якіх затрымалі Новікава, прайшлі 27 і 28 траўня ў Паставах. Андрэй Новікаў – валянтэр ініцыятыўнай групы Сьвятланы Ціханоўскай.
Раней Пастаўскі суд караў Андрэя Новікава штрафам у памеры 30 базавых велічынь паводле таго ж самага артыкулу – за інтэрвію блогеру “Краіны для жыцьця” Сяргею Ціханоўскаму, які сам зараз знаходзіцца за кратамі.
Суд пройдзе ў Паставах 8 чэрвеня. Пра дакладны час паседжаньня пакуль невядома.
Уладзімер Бяляўскі
Камэнтуйце гэтую навіну на нашай старонцы ў facebook!