У пракурорскай пастанове падаюцца фактычныя матэрыялы, якія нібыта ганьбяць дзелавую рэпутацыю і дыскрэдытуюць дзяржаўныя органы і службовых асобаў. Таксама пракурор знайшоў у шэрагу артыкулаў забароненыя звесткі, «патэнцыйна здольныя нанесці фатальную шкоду нацыянальным інтарэсам беларускай дзяржавы».

Як лічаць у пракуратуры, большасць матэрыялаў «Віцебскага Кур'ера news» правакавала грамадзян да экстрэмісцкіх паводзінаў. У асобных артыкулах пракурор Ігар Украінец выявіў шматлікія няпэўныя дадзеныя аб прыняцці службовымі асобамі дзяржорганаў незаконных актаў, утрыманне якіх масава парушалі канстытуцыйныя правы грамадзян.

На думку абласнога пракурора, у «Віцебскім Курʼеры news» прысутнічалі паведамленні, у якіх сцвярджалася, што суды сістэматычна, у закрытых судовых працэсах, выносілі для ўдзельнікаў пратэстаў незаконныя прысуды. Гэта, маўляў, укараняла ў свядомасці жыхароў краіны негатыўнае ўспрыманне работнікаў міліцыі, следчых, пракурораў, суддзяў і іншых дзяржаўных службоўцаў, узмацняла недавер да прыманых імі рашэнняў, падахвочвала грамадзян да супрацьпраўных дзеянняў.

Дадатковым чыннікам прынятай пастановы пракурор назваў шэраг артыкулаў, у якіх мелася інфармацыя, прызнаная беларускімі судамі як экстрэмісцкая.

Цяпер пастанова пракурора Віцебскай вобласці Украінца выкананая, і доступ да сайту «Віцебскі Курʼер news» абмежаваны для жыхароў Беларусі.

Міхась Пісараў