Пятніца, 19 Люты 2021

37 сутак і 140 базавых. Полацкі суд пакараў удзельнікаў шпацыру арыштамі і штрафамі

Ацаніць гэты матэрыял
(3 галасоў)

Полацкі суд 18 і 19 лютага «суткамі» і штрафамі пакараў семярых жыхароў гораду за тое, што яны нібыта фатаграфаваліся на фоне бел-чырвона-белага сцяга. Чацвёра палачан атрымалі вялікія штрафы, трое прысуджаныя да арыштаў.

Увечары 16 лютага ў раёне «Аэрадрому» ў Полацку затрымалі сем чалавек – пяць жанчын і дваіх мужчын. Усіх абвінавацілі ў арганізацыі незаконнага масавага мерапрыемства: фатаграфаваліся на фоне сцяга і выкладалі фота ў тэлеграм-каналах. Затрыманыя сваёй віны не прызналі.

На судзе міліцыянты не падалі ніякіх доказаў вінаватасці затрыманых – не было ні фотаздымкаў, ні фактаў іх публікацыі ў інтэрнэце. Затое былі сведчанні палачанкі Тамашэвіч, якая нібыта бачыла, як грамадзяне фатаграфаваліся са сцягам. Пазней аказалася, што гэта менавіта яна тэлефанавала ў міліцыю. Высветлілася таксама, што Алена Тамашэвіч – супрацоўніца СК. Затрыманнем жа мірных грамадзян 16 лютага кіраваў капітан міліцыі Сяргей Лемеш.

Судовыя паседжанні праходзілі па скайпе, калі затрыманыя знаходзіліся ў РАУС. Дзяніс Кухто асуджаны на 15 сутак арышту (суддзя Уладзімір Бясецкі), Павел Хошчанка – на 15 сутак (суддзя Людміла Блізнёва), Валянціна Сергіенка – на 7 сутак (суддзя Раіса Штуро), Вольга Папкова і Марына Белавус аштрафаваныя на 30 базавых велічынь (суддзя Віктар Баліка), Ірына Рабіза пакараная штрафам на 50 базавых велічынь (суддзя Дзергачоў), Алена Барздукова – на 30 базавых (Блізнёва).

У некаторых з затрыманых прайшлі ператрусы.

Аляксандр Марозаў