Яго перавялі сюды летась у жнiўнi з гомельскай ПУАТ-22 (папраўчая ўстанова адкрытага тыпу). Аляксея абвінавачваюць па артыкуле 415 Крымінальнага кодэксу РБ «Ухіленьне ад адбыцьця пакараньня ў выглядзе абмежаваньня волі», якое выявілася ў парушэньнях рэжыму ўтрыманьня.
Усяго падчас адбыцьця пакараньня ў папраўчых калёніях адкрытага тыпу зь ліпеня 2014 году да нядаўняга часу Аляксей Мілюкоў (Жалноў) атрымаў 8 спагнаньняў. Бацька Аляксея лічыць, што многія спагнаньні выносіліся па неістотных прычынах, фармальна, з мэтаю паўплываць на бацьку, які выкрываў супрацоўнікаў бабруйскай міліцыі, што парушаюць закон, і зьмяшчаў у сеціве пра гэта відэаролікі.
Нагадаем, у ліпені 2014 году Аляксей Жалноў быў асуджаны на тры гады «хіміі» і атрымаў штраф – 50 мільёнаў рублёў. Суд прызнаў яго вінаватым у нанясеньні маральнай і фізычнай шкоды супрацоўніку ДАІ.
За ходам судовага працэсу назіраюць прадстаўнікі Праваабарончага цэнтру "Вясна". Судзьдзя Пётар Леўчанка абвясьціў пра пачатак судовага паседжаньня. У залі – прадстаўнік абвінавачваньня, адвакат, прадстаўнікі дэмакратычнай супольнасьці Наваполацку, журналісты. Аляксея Мілюкова трымаюць пад вартай.
Аляксей Мілюкоў адразу заявіў некалькі хадайніцтваў. Адно зь іх – найбольш істотнае – дапусьціць у якасьці абаронцы па справе у суд свайго бацьку, Алега Жалнова. Суд хадайніцтва не задаволіў. Тады Аляксей Мілюкоў адмовіўся ад паслуг прызначанага адваката і папрасіў час, каб заключыць дамову з адвакатам, якому ён давярае.
Яшчэ адно хадайніцтва тычылася дазволу на вядзеньне відэа– і аўдыёзапісу. У відэазапісу было адмоўлена, а аўдыёзапіс сваякам абвінавачанага можна весьці і без рашэньня судзьдзі. Аляксей Мілюкоў задаў пытаньне: "Як гэты запіс суд зможа далучыць да матэрыялаў справы, і як яго параўнаць з пратаколам паседжаньня, які вядзе сакратар суду?" Судзьдзя паабяцаў адказаць на гэтае пытаньне на наступным паседжаньні, якое прызначанае на 23 жніўня.