15 снежня 2020 году суд Гарадоцкага раёну асудзіў 33-гадовага рабочага Мікалая Чарняўскага на паўтара года калоніі агульнага рэжыму. Суддзя Аляксандр Ляшковіч прызнаў мужчыну вінаватым паводле арт. 369 КК («Абраза прадстаўніка ўлады») і арт. 365 КК («Умяшанне ў дзейнасць супрацоўніка ўнутраных спраў»). Мікалай Чарняўскі цалкам адбыў прысуджаны тэрмін і выйшаў на волю.

З 26 студзеня палітзняволены гомельскі праваабаронца Леанід Судаленка адбывае прысуджанае яму пакаранне пад Віцебскам, у папраўчай калоніі №3 «Віцьба». Паводле ягонай жонкі, сям’я атрымлівае лісты з-за кратаў больш-менш рэгулярна, але ў кожным допісе ён паведамляе, што лісты з волі яму не аддаюць. Фактычна, за ўвесь час знаходжання на «Віцьбе», ніводнага ліста ён не атрымаў, у тым ліку ад дзяцей, кажа Аксана Судаленка.

На 6 сакавіка ў Беларусі налічваецца 1085 палітвязняў, якія асуджаныя на розныя тэрміны абмежавання ці пазбаўлення волі, або ўтрымліваюцца ў СІЗА ў чаканні суда.

У адным з віцебскіх тэлеграм-каналаў  днямі быў размешчаны ліст ад 68-гадовай пенсіянеркі, былой настаўніцы найвышэйшай катэгорыі з Мёраў, якую  ўтрымліваюць у Віцебскім СІЗА-2. Змест кароткага ліста ад 31 студзеня сведчыць пра тое, што ў жанчыны тужлівы настрой і што яна вельмі спадзяецца на сяброўскую падтрымку.