Менавіта па гэтым артыкуле таксама прад’яўленыя абвінавачваньне блогеру Сяргею Ціханоўскаму, Аляксандру Арановічу, Арцёму Сакаву, Васілю Баброўскаму, Вяргілію Ушаку, Дзмітрыю Фурманаву, Уладзіміру Навуміку, Яўгену Разнічэнку і Уладзіміру Кнігу. Усе яны знаходзяцца ў СІЗА-1.
Арт. 342 КК РБ (ч.1): Арганізацыя групавых дзеяньняў, якія груба парушаюць грамадзкі парадак і якія спалучаныя зь відавочным непадпарадкаваньнем законным патрабаваньням прадстаўнікоў улады або якія спрычыніліся да парушэньня працы транспарту, прадпрыемстваў, установаў або арганізацый, альбо актыўны ўдзел у такіх дзеяньнях пры адсутнасьці прыкмет больш цяжкага злачынства – караюцца штрафам, або арыштам, ці абмежаваньнем волі на тэрмін да трох гадоў, або пазбаўленьнем волі на той жа тэрмін.
Андрэй Новікаў – валянтэр ініцыятыўнай групы Сьвятланы Ціханоўскай. Ён грамадзянін Расіі, але нарадзіўся на Пастаўшчыне (Варапаева) і ўжо шмат гадоў жыве ў Беларусі. У яго ёсьць жонка і двое непаўнагадовых дзяцей.
Новікава затрымалі 6 чэрвеня ў вёсцы Прусы за ўдзел у пікеце па зборы подпісаў, які прыраўнялі да несанкцыянаванага масавага мерапрыемства. Затрымлівала Новікава цэлая група супрацоўнікаў міліцыі. Спачатку яго адвезьлі ў Паставы, каб скласьці пратакол па арт. 23.34 КаАП. Затым жа стала вядома, што яго перавезьлі ў Менск у ізалятар часовага ўтрыманьня на вул. Акрэсьціна.
У аўторак 9 чэрвеня ў доме Новікава ў Прусах прайшоў вобшук.
Камэнтуйце гэтую навіну на нашай старонцы ў facebook!