«Да гэтага часу адказ на зварот ПЦ "Вясна" не атрыманы, - адзначаецца ў скарзе, - што зьяўляецца парушэньнем Закону Рэспублікі Беларусь "Аб зваротах грамадзян і юрыдычных асоб". Адмова ў прыёме звароту грамадзяніна або юрыдычнай асобы, альбо парушэньне вызначаных тэрмінаў разгляду такога звароту, альбо неінфармаваньне заяўніка аб рашэньні, прынятым па выніках разгляду звароту, альбо неправамерная адмова заяўніку ў азнаямленьні з матэрыяламі, якія непасрэдна датычацца разгляду звароту, альбо непрыняцьце ў межах сваёй кампэтэнцыі мер па аднаўленьні парушаных правоў, свабод і (ці) законных інтарэсаў заяўніка зьяўляецца адміністрацыйным правапарушэньнем. Права складаць пратаколы па гэтым складзе адміністрацыйнага правапарушэньня дадзена, у тым ліку, пракурору».
Аўтар скаргі просіць прыцягнуць да адміністрацыйнай адказнасьці паводле артыкулу 9.13 КаАП службовую асобу Вярхоўнага суду Рэспублікі Беларусь, вінаватую ў парушэньні закону.
Нагадаем, што ў звароце праваабаронцы прасілі Валянціна Сукалу «выказацца пра сутнасьць крымінальнай справы ў дачыненьні да Міхаіла Жамчужнага, характар зьвестак, якія з парушэньнем вызначанага законам парадку ён здабываў, устаноўленыя прысудам матывы дзеяньняў асуджанага, у межах, якія не пацягнуць разгалошваньня ахоўваемых законам зьвестак». Паводле словаў аўтараў звароту, пералічаная інфармацыя мусіла паўплываць на ацэнку Праваабарончым цэнтрам «Вясна» абгрунтаванасьці і матываў крымінальнага перасьледу Міхаіла Жамчужнага і дазволіць зрабіць выснову, ці зьвязаны гэты крымінальны перасьлед зь яго праваабарончай дзейнасьцю.
Ужо пасьля звароту ў Вярхоўны суд праваабаронцы атрымалі некаторыя дакумэнты па справе заснавальніка ўстановы «Пляцформа» Міхаіла Жамчужнага, якія дазволілі зрабіць выснову пра палітычную матывацыю яго перасьледу, а яго прызнаць палітвязьнем. Адмысловая заява з патрабаваньнем «неадкладнага перагляду прынятага ў яго дачыненьні судовага прысуду пры захаваньні права на справядлівае судовае разьбіральніцтва і лiквiдацыі названых вышэй чыньнікаў» была падтрыманая вядучымі праваабарончымі арганізацыямі Беларусі.
Крыніца: Праваабарончы цэнтар "Вясна"