У сваім звароце Павел спаслаўся на тое, што раней беларусам выносілі адміністрацыйныя пастановы за размяшчэнне ў сетцы БЧБ-сцяга і прызнавалі гэта пікетам (па ч. 1 арт. 24.23 КаАП). Таму ён папрасіў дазволіць правесці масавае мерапрыемства - пікетаванне. 

Дазвольны прынцып правядзення масавых мерапрыемстваў увялі ў новай рэдакцыі закона "Аб масавых мерапрыемствах" у 2021 годзе. Пры гэтым скасавалі апавяшчальны прынцып, калі жадаючыя маглі паведаміць выканкаму аб мерапрыемстве і правесці яго ў дазволеным месцы.

У якасці месца правядзення мерапрыемства праваабаронца ўказаў Facebook. Таксама Павал паведаміў аб часе пачатку і канца пікету.  Ён паабяцаў, што пасля правядзення пікетавання будзе праведзена ўборка тэрыторыі на акаўнце „Павел Левінаў“ у сацыяльнай сетцы „Facebook“. Але атрымаў забарону.

Павел Ісакавіч абскардзіў адмоўнае рашэньне гарадзкіх уладаў у Віцебскі аблвыканкам. Але чыноўнікі вырашылі, што заява аформлена няслушна і пададзена ў парушэнне абзаца другога часткі пятай артыкула 5 Закона "Аб масавых мерапрыемствах". 

Праваабаронца не згодны з рашэннем віцебскіх выканаўчых органаў улады і рыхтуе скаргу ў суд.

Вікторыя Праклова