У руках Барыс Хамайда трымаў плякат, на якім было напісана: «Сёньня, 22.11.2019, у Вільні адбываецца перапахаваньне нацыянальнага героя Беларусі Кастуся Каліноўскага і іншых удзельнікаў вызвольнага паўстаньня 1863-1864 гг. Слава Героям!»
«Мы больш за паўтара стагодзьдзя ня ведалі, дзе пахаваны наш нацыянальны герой Кастусь Каліноўскі і толькі нядаўна даведаліся... Я ня маю сёньня магчымасьці быць там, у Вільні, на перапахаваньні. Але трэба неяк аддаць даніну павагі нацыянальнаму герою нашай краіны. Таму я вырашыў выйсьці з тлумачальным плякатамі і зь бел-чырвона-белым сьцягам», – патлумачыў Барыс Хамайда «Віцебскай Вясьне».
Абышлося без затрыманьня.
Нагадаем, парэшткі аднаго з кіраўнікоў антырасейскага паўстаньня 1863-1864 гг. Кастуся Каліноўскага былі выяўленыя і ідэнтыфікаваныя на гары Гедыміна ў Вільні ў 2017 годзе – праз 153 гады пасьля таго, як ён быў павешаны на загад расейскіх уладаў.
22 лістапада ў Вільні адбываюцца ўрачыстасьці перапахаваньня парэшткаў паўстанцаў. Яны будуць перапахаваныя на могілках Росы ў Вільні. У цырымоніі ўдзельнічаюць біскупы і ваенныя капланы Літвы, Польшчы і Беларусі. Афіцыйную дэлегацыю Беларусі прадстаўляе віцэ-прэм'ер Ігар Петрушэнка. Лукашэнка ў Вільню не паехаў.
Урачыстае перапахаваньне Кастуся Каліноўскага і ўдзельнікаў паўстаньня 1863-1864 гадоў зь Вільні можна глядзець онлайн на тэлеканале «Белсат».
Зьміцер Міраш, фота аўтара