Так, старшыня Віцебскай абласной арганізацыі Беларускага саюзу жанчын Марына Навіцкая ( яна ж кіраўніца галоўнага ўпраўлення ідэалагічнай працы і па справах моладзі аблвыканкаму) заўважыла, што на наступны год запланавана багата мерапрыемстваў. «Аднак важна шукаць нестандартныя падыходы, пазбягаць фармалізму і аб’ядноўваць людзей розных пакаленняў», – зазначыла чыноўніца, па сутнасці, пералічыўшы наяўныя недахопы.

Асобна кіраўніца «абласной ідэалогіі» спынілася на арганізацыі «дыялогавых пляцовак». Гэты фармат на Віцебшчыне лічыцца наватарскім – прынамсі, так кажуць у афіцыйных інтэрв’ю іх удзельнікі. Як гэта выглядае на практыцы, можна было пераканацца падчас імпрэзы да 85-годдзя Віцебскай вобласці – аўтамарафону «85 лет пад небом Витебщины». Група дзяржаўных службоўцаў разам з прадстаўнікамі БРСМ аб’ехала ўсе райцэнтры, дзе на сустрэчы з імі збіралі «грамадскасць». Выступоўцы выступалі, слухачы слухалі…. «У нашай краіне развіваецца практыка дыялогавых пляцовак, аднак яны насамрэч мусяць быць дыялогавымі. Часам трэба і вострую тэму абмеркаваць, негатыў раскласці па палічках, прааналізаваць сітуацыю», – заўважыла спадарыня Навіцкая.

Што яшчэ плануюць рабіць удзельнікі каардынацыйнай рады ў 2023 годзе? Паводле старшыні рады Валяр’яна Мацкевіча, асаблівых навацый чакаць не даводзіцца. Анансаваны працяг «працы шляхам правядзення акцый, канферэнцыі, круглых сталоў і іншых формаў узаемадзеяння з насельніцтвам». Пераважная большасць жыхароў вобласці, грэбліва названых «насельніцтвам», апрача як з дзяржаўных СМІ, увогуле наўрад ці даведалася б пра існаванне Каардынацыйнай рады грамадскіх аб’яднанняў і палітычных партый. Бо імпрэзы, арганізаваныя радай, праводзяцца для абмежаванага кола ўдзельнікаў і «для галачкі».

Жанна Жалейка