Аўторак, 13 Верасень 2022

Актывіст незалежнага прафсаюзу Віктар Стукаў мае адбыць 30 сутак арышту

Ацаніць гэты матэрыял
(1 голас)
Актывіст незалежнага прафсаюзу Віктар Стукаў мае адбыць 30 сутак арышту

Актывіста затрымалі 12 верасня на полацкім вакзале, проста ў цягніку «Полацк-Масква», на якім ён выправіўся ў госці да сваякоў. На думку сяброў, сваю ролю адыграла тое, што квіток быў іменны, а полацкая міліцыя ўжо год шукала Віктара Стукава, каб накіраваць яго на 15 сутак арышту паводле судовага рашэння леташняй даўніны. На актывіста ў прысутнасці астатніх пасажыраў надзелі кайданкі і змясцілі пад варту. 13 верасня над ім адбыўся яшчэ адзін суд.

Паводле апошняга судовага рашэння, Віктар Стукаў прызнаны вінаватым у несанкцыянаваным пікетаванні. У ягоных сацыяльных сетках знайшлі фотаздымкі з пратэстаў 2020 г. Суд вырашыў, што такім чынам Стукаў праводзіў у інтэрнэце несанкцыянаваную акцыю, і паводле артыкула 24.23 пакараў яго арыштам на 15 сутак.

У дадатак да гэтага тэрміну, Віктар Стукаў мае адбыць 15-суткавы арышт, прысуджаны яму яшчэ летась за парушэнне артыкула 19.11 КаАП. Тады актывіста асудзілі за рэпост артыкула з сайта вядомага тэлеканала, пазней прызнанага экстрэмісцкім. Аднак судовага рашэння Стукаў на рукі не атрымаў, дый міліцыя не надта шчыравала, каб адразу ж яго арыштаваць ды завезці ў ІЧУ. Цяпер ён мае адбыць у ізалятары 30 сутак арышту агулам.

Міхась Хмара      

Апублікавана ў Адміністрацыйны перасьлед
Тэгі:
Яшчэ ў гэтым разьдзеле: « Жанчыну, якая правяла акцыю на лінейцы ў Наваполацку, ужо двойчы асудзілі Суд адмовіўся прызнаць пікетам наяўнасць бел-чырвона-белых магніцікаў на хатнім халадзільніку »
Вярнуцца ў пачатак